le gusta co minde mutce

By 宮沢賢治 (mi,iaza,uan.kenj), tijlan and xorxes

le gusta co minde mutce ( re moi velfarvi )

ca'o ku zo'i sai lo cmana co kasakasas tricypezli cu cadzu fa re citno nanmu goi cyny poi simsa lo'e bri'ito sonci lo nu jancybevri lo pikapikak ceclyxarci gije se kansa re blabycribe pe'a gerku gije simxu cusku tu'e lu
su'a lo'e vi va cmana cu xlali .oi .i no sai cipni ja vlilydanlu le'o .i .au .o'inai tantan gunta da .e'inai
li'u .i lu
ba'a lo nu friti le'o so'o danti fa'a lo mirli ke pelxu betfymlana cu pluka mutce .i ba'a my kurkur carna gije loldyfarlu tai zo'e .a'u .u'i
li'u tu'u .i ke'u zo'i sai nenri lo cmana .i ri tai condi ja'e lo pu nu lo cyny gidva noi ceclyxarci certu cu terpa cliva .i ji'a ge tai bapli gi le blabycribe pe'a gerku cu kalsa kanlymuvdu xalni gije krixa gije vamtu loi fonmo gije morsi binxo .i lu
.oi mi ba'o rupnu be li revonono vamji cirko sei sa'a lo gerku
li'u se cusku pa cyny goi ko'a sei laftygau lo le gerku ku kanlygacri .i lu
mi zo'u rupnu be li rebinono
li'u se cusku le drata goi ko'e sei stedu vreta gije xenrysteba simlu .i ko'a co'a se flirytcima lo xlali ru'e gije catlu ko'e secu'u lu
mi xrukla .ai
li'u .i lu
.o'e mi ji'a co'a ganse lo nu ge lenku gi xagji .i xrukla .ai .ie
li'u .i lu
ki'u ku nau .uo sisti .ai .i'i .i .u'ucu'i veka'a te vecnu lo ma'arjipci le prulamdei xotli lo rupnu be li pano
li'u .i lu
pu go'i loi ractu .i ja'o ca ba na fu'i frica .i ki'u gasnu .ai peinai
li'u .i ku'i bu'o.oi dai ma kau drani pluta .i co'a douf brife gije za,uaza,uaz tricypezli gije gotogoton mudri .i lu
ro'o betfu kunti .i mlana cortu ze'a .oi
li'u .i lu
go'e ra'o .i cadzu .aunai bu'o
li'u .i lu
cadzu .aunai .i .oi ro'e .i citka .au ro'o
li'u .i lu
citka .au .ie
li'u .i lo cyny se cusku cu se vanbi lo za,uaza,uaz srasygunma .i sei fa'a ti'a catlu cu zvati fa pa nobli je ro'opno simlu zdani .i dandu lo barvorme fa lo tcita po zoi
RESTAURANT
WILDCAT HOUSE
zoi .i lu
doi .o'usai .i tai cilce vanbi gije tai kagni stuzi .u'e .i .ai peinai mi'o nerkla
li'u .i lu
.uanai .a'e tai zvati .i ku'i do'a za'a vi ka'e citka zo'e
li'u .i lu
ju'osai go'i .i ki'u tai tcita .ia
li'u .i lu
nerkla .ai peinai .i .au nejni xruti ri'a lo nu citka
li'u .i cyny sanli vi ca'u le barvorme noi nobli se greku lo blabi stakybliku gije te ciska lu
doi ro do .io .e'o ko nenri .i na'e fanta tu'a ko
li'u .i cyny ki'u gleki mutce secu'u lu
.u'e xamgu selzbasu munje .i ge pu tai raktu ze'u lo cabdei gi ca tai pluka .i za'a ti gusta co nonjdima
li'u .i lu
.ia go'i .i lu na'e fanta tu'a ko li'u se smuni ra .ei
li'u .i cyny  le vorme mo'ine'i catke .i ce'obo fe'e co'a bitmypluta .i sei fa'a ti'a catlu le vorme trixe te ciska lu
.i sa'e mi'a mutcyselfu lo plana ja citno vau fi'isai
li'u .i cyny ki'u za'u re'u gleki mutce .i lu
.e'e mi'o ca'a citno .i se mutcyselfu mapti .ui
li'u .i lu
go'i sai .ui
li'u .i zo'i klama fo le bitmypluta .i zvati fa lo tsanyblanycinta vorme .i lu
ge'e cizra zdani .i .uanai ki'u ma fe'e so'i roi vorme
li'u .i lu
pe'i ti jai ru'usko tadji .i va'o lo lenku ja cmana ta'e tai se zbasu
li'u .i sei pu'o lo nu kargau lo za'u moi vorme cu fa'a ga'u catlu cu te ciska lu
.i mi'a gusta co minde mutce .i .e'o ko .io bredi
li'u .i lu
pe'i se vitke mutce .i to'eki'unaibo tai cmana zei zo'i stuzi
li'u .i lu
.ia .ie .i ju'i ba'anai bu'u la tokion cu rirci fa lo nu lo xamgu gusta cu zvati lo barda dargu
li'u .i cyny tai secu'u kargau le vorme .i lo ri trixe cu te ciska lu
.i dai ba minde mutce .i .e'o ko .io ro roi renvi
li'u .i lu
.oi ti se smuni ma sa'e
li'u .i ko'a co'i frumu .i lu
pe'i tu'a lo nu lo minde cu ri'agi mutce gi fanta lo nu sutra sabji
li'u .i lu
.ua ro'e .i ja'o .ai .i'i nenri lo kumfa .i au nu jubme surla
li'u .i sei kumfa nenri se'u .oi dai za'u re'u va vorme .i vi dandu fa lo minra .i ni'a zvati fa lo clani grana joi burcu .i le vorme cu xunre lerfu te ciska lu
.i doi vitke .io .e'o ko vi gasnu lo nu ge loi kerfa cu cnici gi loi cutci cu jinsa lo dertu
li'u .i lu
ro'e no'e cizra
li'u .i lu
.ie tadji tinsa gusta .i pe'i cafne se vitke lo nobli prenu
li'u .i cyny gasnu tu'a loi kerfa je loi cutci .i ba zi lo nu fi lo tanbo cu punji le burcu kei ge ri vouf canci tai lo bumru gi douf brife mo'i ne'i le kumfa .i cyny ri'agi se jenca gi jmaji simxu gije vlile kargau lo za'u moi vorme seka'a lo lamji kumfa .i cyny smadi lo nu ganai na kanro zenba sutra va'u loi glare cidja gi ba tceraktu fasnu .i ne'i ku za'u re'u vorme secu'u lu
.i .e'o ko lo ceclyxarci jo'u danti ti punji
li'u .i sei catlu vi ne'a xekri tanxe .i lu
ro'e .ie fanza fa lo nu ceclyxarci tagji citka
li'u .i lu
.ia ke'u lo tcenobli ta'e sai vitke
li'u .i cyny lo ceclyxarci je lo skapydasri cu toltagjygau gije punji fi le tanxe .i lo za'u moi vorme cu xekri secu'u lu
.i .e'o ko toldasnygau lo mapku je lo kosta je lo cutci
li'u .i lu
ge'e minde pei
li'u .i lu
minde .ai .i .ia so'i tcenobli ca zvati ta
li'u .i cyny genxu dandygau lo mapku je lo kosta gije toldasnygau lo cutci gije zo'i petapetap cadzu pa'o le vorme .i lo ri trixe cu te ciska lu
.i .e'o ko vi punji lo cnebydasrypijne je lo xancykarli batke je lo lacni je lo jdinydakli je ro lo drata jinme to sa'e lo jipnykinli
li'u .i vi ne'a xekrycinta je nobli snurytanxe co moklu kalri .i kansa fa lo ckiku ji'a .i lu
ro'e pe'i va pilno lo dikca lo nu jukpa .i lo jinme dacti va'o ckape .i ra'ucu'i lo ji'a jipnykinli cu ckape .i tai smuni .ia
li'u .i lu
go'i .ia .i ku'i lo jdinydakli zo'u seja'e ba pleji bu'u ti xu ca lo nu cliva
li'u .i lu
go'i la'a
li'u .i lu
ge'e
li'u .i cyny lo lacni je lo batke je lo drata cu toldasni gije selvaugau fi lo snurytanxe .i patcin stelygau ri .i pa'o ku za'u re'u vorme .i vi pa mei ke blaci patxu .i le vorme cu te ciska lu
.i .e'o ko gasnu lo nu lo do flira je xance je jamfu ve'e se gacri le kruji po le patxu
li'u .i sei fa'a lo nenri be le patxu cu catlu cu kruji co ladru .i lu
mi'o se gacri loi kruji vau .uanai
li'u .i lu
ti zo'u ro'e pe'i tu'e va'o lo nu lo vu bartu cu mutce lenku kei lo va glare kumfa ka'e rinka lo nu skapyfenra .i ri se fanta lo kruji tu'u
li'u .i cyny gasnu lo nu le patxu kruji cu gacri lo flira je lo xance je sei toldasnygau be lo smoka lo jamfu .i cyny ki'u lo nu ne'i le patxu za'o kruji cu citka ky .i babo zi kargau lo za'u moi vorme .i lo ri trixe cu te ciska lu
.i xu do nau banzu se gacri .i lo kerlo cu go'i xu
li'u .i vi za'u re'u cmalu patxu fi'o kruji .i lu
.ua .ie na go'i se'i .i .ii pupu'o ri'a kerlo skapyfenra .i za'a le ti gustyjatna cu kurji mutce
li'u .i lu
.ie kurji satci .i zu'unai ku'i zi co'a citka .au .i fanza fa lo nu tai ru'i bitmypluta
li'u .i vi ca'u ku za'u moi vorme secu'u lu
.i ba zi jukpa mulno .i ju'o ditcu lo mentu be li me'i pamu .i zi nuncitka cumki .i .e'o ko sutra gasnu lo nu lo do stedu cu se carvi lo tsapydjacu po lo vi botpi
li'u .i ca'u le vorme cu solji carmi botpi .i go'i lo tsapydjacu .i cyny fi'o jgari fa'a le stedu cu pacapacac carvygau .i .ue dai panci co sarvanju .i lu
sarvanju .uanaisai
li'u .i lu
la'a srera punji .i .ia lo selfu cu bilma gije srera
li'u .i cyny ze'o kargau le vorme .i ti'a ri barda lerfu ciska lu
.i dai lo nu ze'u minde cu fanza .ia .i zi mulno .o'u dai .i ro mai gasnu la'e di'e po'o .i .e'o ko ve'e danrysatre lo do xadni lo silna po ne'i lo vi patxu
li'u .i za'a dai vi blanu staku ke nobli patxu .i go'i lo silna .i ku'i nau ku cyny co'a terpa gije simxu catlu lo vo'a flira noi ba'o mutce co se gacri lo kruji .i lu
ge'e cizra
li'u .i lu
go'i ge'e
li'u .i lu
lu minde mutce li'u zo'u minde fa ra fe mi'o vau .ua
li'u .i lo'u
zo gusta zo'u xu genai gusta da lo vitke gi gusta lo vitke da .i ja'o se smuni .y l l l lo nu m m mi'o ...
le'u .i co'a gatagatat desku ke bacru nandu .i lo'u
... .y m m m mi'o ... .iicaiii
le'u .i lo'u
.e e e ei cliv ...
le'u .i sei gatagatat ko'a tu'a le ti'a vorme cu troci catke .i ku'i .ue .ii dai ri to'e sai muvdu .i ti'anai ku va za'u moi vorme .i re mei se ckikykevna co barda .i rijno ve pixra tu'a lo forca jo'u dakfu secu'u lu
.i .uo ki'e .i fi'i ko .io nerkla
li'u .i di'o to'o lo ckikykevna re blanu kanlybolci cu kiorkior catlu .i cyny zo'u lu
.ii sai
li'u sei gatagatat lu
.ii sai
li'u gatagatat .i cyny co'a klaku .i to'o le va vorme cu kosokosos sance fa tu'e lu
.a'o nai za'a ra ba'o facki .i na ba gasnu tu'a le silna
li'u .i lu
.ie la jatna sepo le cusku tadji cu xlali .i notci lu dai lo nu ze'u minde cu fanza .ia .i zi mulno .o'u dai li'u .ionai zo'u bebna
li'u .i lu
.a'ucu'i .i ka'u mi'o na ba se fatri lo do'anai bongu .oi
li'u .i lu
go'i .ie .i je mi'o ba fuzme lo nu ra ti na nerkla
li'u .i lu
klamycpedu .ai pei .i .ai

.i coi vitke .io .i ko sutra klama .e'o .i klama klama .e'o .i lo palta ba'o jinsa .i je lo kobli ba'o silna mixre .i balvi fa lo po'o nu do .io jorne lo kobli gi'e cpana lo palta .i .e'o sutra klama
li'u .i lu
klama klama .e'o .i xu do na'e nelci lo nu salta .i ganai go'i gi fi'i nu fagri jelca .i sa'u sutra klama .e'o
li'u tu'u .i cyny zo'u ri'a lo nu xalni kei lo flira co'a simsa lo kcakcac peljyfesti .i sei simxu catlu cyny vurvur desku gije voksa claxu klaku .i va fufuf cmila gije cladu cusku lu
klama klama .e'o .i ganai do tai klaku gi lo kruji ba flecycliva to

vi'o bredi doi .io jatna

toi .i ju'i vitka do'u sutra klama .e'o
li'u .i lu
klama .e'o .i la .io jatna za'o cutnybukpu dasni gije dakfu jgari gije tance mosra vau seva'u do
li'u .i cyny klakyklaku klakyklaku klaku .i nau .ue to'o ti'a sance fa lu
uan uan uan 
li'u .i daspo le vorme gije plipe nerkla le kumfa fa re le pu blabycribe pe'a gerku .i le ckikykevna sepo le kanlybolci zi sai cliva .i le gerku te'e le kumfa cu cmoni klama gije babo krixa gije plipe fa'a le ro moi vorme .i gatar kalri binxo fi'o se sakci le gerku .i manku fi'o sance lu
niaon uan gorgor
li'u .i babo lu
gasagasas
li'u .i le kumfa tai lo danmo cu canci .i cyny se vanbi loi srasu .i sei lenku cu vurvur desku .i sanli stali .i sei viska le pu taxfu jo'u cutci jo'u cnebydasrypinje cu kalsa dandu lo ricyjimca jo'u ricygenja .i douf brife .i kasakasas tricypezli .i gotogoton mudri .i sei fuun le gerku cu cmoni xrukla .i je to'o ti'a krixycusku lu
doi jatna .i doi jatna
li'u .i seri'abo cyny cikna zenba gije krixycusku lu
ti doi .i ti doi
li'u .i teka'a za,uaza,uaz catke loi srasu fa le pu maxrymapku kaltycertu gidva .i cyny nau .o'u zei cinmo .i citka lo poi le gidva cu bevri ku'o rismybolci .i xrukla lo tokion zo'a fi'o se vecnu lo ma'arjipci .i ku'i le noi pu pa roi binxo lo simsa be lo peljyfesti ku'o flira ba lo nu go'i kei ba lo nu glarydjacu jinru kei za'o na cenba

fa'o